Makatang Pinoy

MAKATANG PINOY 

kayraming makatang / dapat kilalanin

kaya mga tula / nila'y babasahin

pati talambuhay / nila'y aaralin

upang pagtula ko'y / sadyang paghusayin

at ngayon, naritong / binuklat kong sadya

librong Pag-unawa / sa Ating Pagtula

na aklat ni Rio / Alma, na makata

Pambansang Alagad / ng Sining sa bansa

Francisco Balagtas, / at Lope K. Santos

Marcelo del Pilar, / Benilda S. Santos

Amado Hernandez, / at Benigno Ramos

Teo Baylen, Jose / Corazon de Jesus

Teo T. Antonio, / at si Vim Nadera

Cirio Panganiban, / at si Mike Bigornia

at si Alejandro / Abadilla pala

na pawang dakilang / makata talaga

Elynia Mabanglo, / Lamberto Antonio

pati si Joi Barrios, / at Rolando Tinio

Rebecca't Roberto / Anonuevo rito

ay kahanga-hangang / makata, idolo

si Glen Sales, Joel / Costa Malabanan

Sidhay Bahaghari, / kayrami pa naman

Danilo C. Diaz, / bugtong ay sagutan

maraming salamat / sa mga tulaan

- gregoriovbituinjr.

11.30.2024

* kinatha ngayong ika-161 kaarawan ni Supremo Gat Andres Bonifacio 

Lugaw na naman

LUGAW NA NAMAN

lugaw muli ang pagkain ni misis

sa ospital, sa lugaw nagtitiis

bawal muna sa kanya ang matamis

o kaya'y maalat na parang patis

aba'y pangtatlumpu't siyam na araw

na namin ngayon, pagkain ay lugaw

na pamatid-gutom sa araw-araw

rasyon ng ospital, meron pang sabaw

pinagandang tawag sa lugaw: congee

warfarin diet sa kanya'y sinilbi

sa umaga, tanghali hanggang gabi

hanggang kalagayan niya'y bumuti

pag nagsawa siya, ako'ng kakain

kaysa mapanis, di ko sasayangin

pagkat ito nama'y lamang tiyan din

at laking tipid pa para sa akin

bibilhin ko naman ang kanyang gusto

basta sakit ay di lumalang todo

paggaling niya'y pangunahin dito

kaya nakabantay talaga ako

- gregoriovbituinjr.

11.30.2024

* kinatha ngayong ika-161 kaarawan ni Supremo Gat Andres Bonifacio 

Nilay sa salawikain

NILAY SA SALAWIKAIN

nagtitipon ako / ng salawikain

na marapat lamang / na pakaisipin

baka makatulong / upang paghusayin

ang buhay na iwi't / kalagayan natin

magandang pamana / mula sa ninuno

sa mga panahong / ang ilaw pa'y sulo

mga aral yaong / kanilang nabuo

kaya payo nila'y / kapara ng ginto

yaong di lumingon / sa pinanggalingan

di makararating / sa paroroonan

ang mga bayani / pag nasusugatan

ay nag-iibayo / ang kanilang tapang

pag naaning mangga'y / sangkaterbang kaing

ay alalahanin / ang mga nagtanim

sa hapag-kainan / pag may haing kanin

ay pasalamatan / kung sinong nagsaing

kapag nagkaisa / tungo sa paglaya

itong bayang api, / kakamti'y ginhawa

pag ipinaglaban / ang mithing dakila

ang ating kakampi'y / uring manggagawa

ang isa mang tingting / madaling baliin

ngunit maganit na / pag sandaang tingting

halina't alamin / ang salawikain

ng ating ninuno't / isabuhay natin

- gregoriovbituinjr.

11.30.2024

* kinatha sa ika-161 kaarawan ni Supremo Gat Andres Bonifacio

Ang mamahalin at ang mumurahing saging

ANG MAMAHALIN AT ANG MUMURAHING SAGING

nakabili ako ng saging sa 7-11

pagkat nais ko'y panghimagas matapos kumain

isa iyong lakatan subahil kaymahal na rin

ngunit ayos lang sapagkat tiyan ko'y nabusog din

hanggang mabasa ko ang isang ulat sa internet

tungkol sa banana art na sa dingding ipinagkit

na isinubasta at milyonaryo ang nagkamit

presyo'y 6.2 million dollar, wala nang humirit

tila sa kanya, presyo niyon ay napakamura

gayong sa akin, yaong bente pesos na banana

ay mahal na, talagang nakabubutas ng bulsa

magkaibang uring minulan, sadyang magkaiba

marahil ay pareho rin naman ang aming saging

kung matamis sa kanya, matamis din ang sa akin

ginawang banana art ang kanya kaya mahal din

subalit kapwa may potassium din kapag kinain

- gregoriovbituinjr.

11.30.2024

Ang makita ng makata

ANG MAKITA NG MAKATA

sa paligid ay kayraming paksa
samutsaring isyu, maralita,
dilag, binata, bata, matanda,
kalikasan, ulan, unos, baha

kahit mga karaniwang gawa
ng magsasaka at manggagawa
anumang makita ng makata
tiyak gagawan niya ng tula

tulad ng inibig niyang kusa
sinta, madla, tinubuang lupa
nasunugan, naapi, kawawa
tutula siyang puno ng sigla

pagkat buhay niya ang kumatha
at kakatha siyang buong laya
subalit di ang magpatirapa
sa mapang-api, tuso't kuhila

kung dapat, maghihimagsik sadya
upang hustisya'y kamtin ng madla
pluma niya'y laging nakahanda
maging ang katawan, puso't diwa

- gregoriovbituinjr.
11.30.2024

* kinatha sa ika-161 kaarawan ni Supremo Gat Andres Bonifacio

Pakner sa paglaya ng inaapi

PAKNER SA PAGLAYA NG INAAPI

Nobyembre 29 - International Day of Solidarity with the Palestinian People 

minsan, pakner kami ni Eric pag may rali

o kung may aktibidad tulad ng sa U.P.

pag sinigaw namin: From the River to the Sea!

ay sasagot ang iba: Palestine will be Free!

kaya nga, ngayong Nobyembre bente-nuwebe

na International Day of Solidarity

with the Palestinian People, kaisa kami

nila na kalayaan yaong sinasabi

habang sa uring manggagawa nagsisilbi

sa bandilang Palestino, kami'y nag-selfie

na isyu ng paglaya nila'y mapalaki

at mapalayas ang mananakop na imbi

ka Eric, mabuhay ka't pagkilos ay pirmi

sana'y dinggin ng mundo ang ating mensahe

mga kasama, makiisa tayo dine

hanggang madurog ang anumang pang-aapi

- gregoriovbituinjr.

11.29.2024

* kuha ang litrato sa unang araw ng Fight Inequality Alliance (FIA) Global Assembly mula Setyembre 4-7, 2024 sa UP Diliman

Pakikiisa sa mamamayang Palestino

PAKIKIISA SA MAMAMAYANG PALESTINO

naritong nagpupugay ng taaskamao

sa lahat po ng mamamayang Palestino

sa International Day of Solidarity

with the Palestinian People ngayong Nobyembre

nawa'y mapagtagumpayan ninyo ang laban

mula sa panunupil ng kalabang bayan

nawa lugar ninyo'y tuluyan nang lumaya

at maitatag ang isang malayang bansa

kami rito'y lubusan pong nakikiisa

kami'y kasandig ninyo sa pakikibaka

laban sa pagsasamantala't pang-aapi

upang mananakop ay tuluyang iwaksi

magkasangga tayo sa lipunang pangarap

na wala nang kaapihan sa hinaharap

lipunang makatao'y dapat maitayo

at dapat maitatag sa lahat ng dako

- gregoriovbituinjr.

11.29.2024

MABUHAY ANG MGA PALESTINO!

Nobyembre 29 - International Day of Solidarity with the Palestinian People 

Ang galas pala'y mapulang lupa

ANG GALAS PALA'Y MAPULANG LUPA

may Mapulang Lupa sa Las Piñas

sa bandang Sampaloc ay may Galas

naalala ngayon at nawatas

dalawang lugar pala'y parehas

ng kahulugan, aking nalaman

mula sa isang palaisipan

sa tanong sa Talumpu Pahalang

na tunay na dagdag-kaalaman

ang galas pala'y mapulang lupa

na marahil sinasakang sadya

upang magkapalay na dakila

upang gawing bigas nitong madla

wala ako ritong diksyunaryo

pagkat nasa ospital pa ako

buti'y may krosword akong narito

may natutunan na namang bago

- gregoriovbituinjr.

11.29.2024

* krosword mula sa pahayagang Abante, Nobyembre 24, 2024, p.7

Balagtas mula bagtas, kalamyas mula kamyas

BALAGTAS MULA BAGTAS, KALAMYAS MULA KAMYAS

Sa lalawigan ni Itay sa Batangas, ang tawag sa bungang KAMYAS ay KALAMYAS na madalas isahog sa sinaing na tulingan. Nadagdagan ng "la" ang KAMYAS. Kumbaga, ang kamyas sa Maynila ay kalamyas sa Batangas. Ang aking ama'y mula sa Balayan kung saan palasak ang sinaing na tulingan. Ang kalamyas na pinatuyo mula sa pagkabilad sa araw ang paborito kong papakin sa sinaing na tulingan.

Mas napansin ko ang paggamit sa "la" ngayon nang talakayin ni Pambansang Alagad ng Sining para sa Panitikan Virgilio S. Almario na ang BALAGTAS ay mula sa salitang BAGTAS. Tulad din ng kalamyas na nadagdagan ng "la" sa salita.

Binabasa ko ang aklat na Kulo at Kolorum ni Almario, pahina 31, at nabanggit niya iyon. Ayon sa kanya, "Una, dahil isang totoong Tagalog na salita ang "balagtas" - varyant ng "bagtas" at katumbas ng shortcut natin sa Ingles. Ikalawa, bahagi ng kadakilaan ng Florante at Laura ang idinulot nitong simbolikong pagbagtas ng panitikan ng ..."

Panlapi ba ang "la"? Ito ang tila sinasabi sa mga nabanggit na salita. Mayroon tayong gitlaping "la". Bukod sa Balagtas at kalamyas, may iba pa kayang salitang gumagamit ng gitlaping "la"?

Dagdag pa ni Almario, "Sa kasulatan ng binyag, isinunod ang pangalan ng makata sa pangalan ng ama na si Juan Balagtas ng Panginay, Bigaa, kaya bininyagan siyang "Francisco Balagtas."

Ginawan ko ng munting tula ang usaping ito:

GITLAPING "LA"

ani Almario, mula "bagtas" ang "Balagtas"

dahil panitikan ng bayan ang binagtas

para pala itong kalamyas sa Batangas

na dinugtungan ng gitlaping "la" ang kamyas

mga dagdag-kaalaman ang mga ito

nang mapaunlad pa ang wikang Filipino

at mabatid ng tagapagtaguyod nito

gaya ng makata't manunulat tulad ko

sa mga saliksik ko'y isasamang sadya

at magagamit sa anumang maaakda

ang gitlaping "la" ay luma ngunit sariwa

na karaniwan nang ginagamit ng madla

maraming salamat, mga ito'y nabatid

wikang lalawiganin ay may naihatid

at napagtantong kung sakaling may balakid

sa pagpaunlad ng wika'y maging masugid

- gregoriovbituinjr.

11.29.2024

Pananghalian sa ospital

PANANGHALIAN SA OSPITAL

pananghalian dito'y gulay, isda't lugaw

ayaw kumain ni misis, siya'y busog daw

natulog siya't ibibili ko mamaya

ng kanin at ulam na gusto niyang sadya

gulay, isda't lugaw ay aking kakainin

kaysa masira't ayokong ito'y sayangin

kahit ito'y lugaw, lamang tiyan din ito

may gulay pa at bangus na uulamin ko

ganyan minsan ang buhay dito sa ospital

habang nakabantay sa aking minamahal

asam kong gumaling na siya't magpahinga

at kanyang hemoglobin sana'y magdose na

wari ko'y nasa piketlayn o bilangguan

may rasyong pagkain laban sa kagutuman

gulay, isda't lugaw man, huwag maliitin

dahil laking tipid kaysa labas kumain

- gregoriovbituinjr.

11.28.2024

Pagbabasa sa ospital

PAGBABASA SA OSPITAL

ikatatlumpu't pitong araw sa ospital

animo'y tahanan ng higit isang buwan

dito na naghahapunan, nag-aalmusal

nagbabawas, labahan, liguan, tulugan

umuwi akong bahay, saglit na lumabas

at ang aking mga libro'y agad kinuha

bumalik ng ospital at sa libreng oras

hanggang hatinggabi ako'y nagbasa-basa

kwaderno't panulat ay laging nakahanda

upang itala anumang nasok sa isip

sumagot ng palaisipan at tumula

paksa sa binasang aklat ay nililirip

lalo't ang pinayo ko sa aking sarili

basahin ang anuman, maging kasaysayan

baka may matutunan at magmuni-muni

habang nagbabantay pa rin sa pagamutan

- gregoriovbituinjr.

11.28.2024

Lugaw

LUGAW

nakasanayan ko nang kumain ng lugaw

na pagkain ng pasyente sa pagamutan

na pag ayaw ni misis at ako ang bantay

lugaw yaong siya ko namang lalantakan

kay misis ay may pagkaing para sa kanya

habang ako'y sa labas bibiling pagkain

sa ospital naman ay mayroong kantina

na sa araw-gabi, ako'y doon kakain

sa kanyang tiyan si misis muna'y alalay

dahil kasi baka mabigla ang sikmura

sistema'y warfarin o pagkaing ospital

na pag di naubos sa akin ibibigay

sanay na akong maglugaw na dati'y hindi

upang di masayang ang pagkaing narito

buti't ang tiyan ko'y di naman humahapdi

naglulugaw man, nabubusog ding totoo

- gregoriovbituinjr.

11.27.2024

Pagbaka para sa alternatiba

PAGBAKA PARA SA ALTERNATIBA

ano nga bang alternatiba sa kapitalismo?

paano itatayo ang lipunang makatao?

sino ang dapat kumilos upang mangyari ito?

bakit dapat manguna rito'y ang uring obrero?

ah, kayrami kong katanungang dapat pagnilayan

mabuti't may mga pagtitipong nadadaluhan

na pinag-uusapan ay sistema ng lipunan

na mga kasama'y tibak na tagaibang bayan

lumaki na ako sa lansangan at nagrarali

at inaaral paano sistema'y makumpuni

kung saan walang pagsasamantala't pang-aapi

kaya patuloy ang pagkilos sa araw at gabi

halina't masdan ang paligid at tayo'y magnilay

sistemang bulok ay paano wawakasang tunay

dapat may alternatiba, pagkakapantay-pantay

walang mahirap, walang mayaman, patas ang buhay

- gregoriovbituinjr.

11.26.2024

* notbuk at bolpen ay mula sa dinaluhang Fight Inequality Alliance (FIA) Global Assembly noong Setyembre 4-7, 2024 sa UP Diliman

No right turn, di agad makita

NO RIGHT TURN, DI AGAD MAKITA

natatakpan ng haligi ang karatula

"no right turn on red signal", di agad makita

buti kung ang drayber ay mabilis ang mata

sa kanan ay di agad liliko talaga

wala bang ginawa ang mga awtoridad

upang karatula'y iwasto at ilantad

habang trapik ay patuloy na umuusad

paumanhin kung ito'y napuna't nilahad

habang napadaan sa isang interseksyon

ay nakunan ko lamang ng litrato iyon

paglabas ng ospital nang madaan doon

ngunit di ko na tanda ang lugar na iyon

ang nasabing karatula sana'y ayusin

ipwesto ng tama kung saan mapapansin

- gregoriovbituinjr.

11.25.2024

* litrato ng makatang gala sa isang intersekyong di niya kabisado

Tabletas

TABLETAS

kailangan ng tabletas

na ipainom kay misis

sa noo ko'y mababakas

ang kanyang ipinagtiis

alas-sais ng umaga

tabletas na'y iinumin

pagkatanghali'y meron pa

hapon hanggang takipsilim

tuloy ang pangangalaga

kahit na kulang ang tulog

mahalaga'y may magawa

nang si misis ay lumusog

sana'y bumuti ang lagay

at lumakas siyang tunay

- gregoriovbituinjr.

11.25.2024

Nilay

NILAY

nais kong mamatay na lumalaban

kaysa mamatay lang na mukhang ewan

ang mga di matiyaga sa laban

ay tiyak na walang patutunguhan

minsan, pakiramdam ko'y walang silbi

sa masa pag nag-aabsent sa rali

tila baga ako'y di mapakali

kung kikilos lang para sa sarili

ngunit ngayon ako'y natitigagal

pagkat sa rali ay di nagtatagal

pagkat nagbabantay pa sa ospital

dahil may sakit pa ang minamahal

siya muna ang aking uunahin

at titiyaking mainit ang kanin

mamahali't aalagaan pa rin

sana siya'y tuluyan nang gumaling

- gregoriovbituinjr.

11.24.2024

Dapat nang kumayod

DAPAT NANG KUMAYOD

kumayod, magtrabaho't maging sahurang alipin

mga solusyon sa problema'y dapat hagilapin

ang buhay ko'y balintuna, aktibista, makata

kaysipag tumula gayong walang pera sa tula

sa masa'y kumikilos kahit na walang panustos

walang pribadong pag-aari, buhay ay hikahos

ang ginagawa'y Taliba, tumula't magsalaysay

kumatha ng mga kwento't pagbaka'y sinabuhay

ngunit ngayon, nahaharap sa problemang pinansyal

mga ipon ay di sapat pambayad sa ospital

naging tao nang nananalasa'y kapitalismo

kumilos upang lipunan ay maging makatao

subalit dapat kumayod, paano magkapera

ng malaki't may ipon para sa emerhensiya

hindi upang yumaman, kundi may ipampagamot

kalusugan ay lumusog, at mapatay ang salot

subalit sinong tatanggap sa akin sa pabrika?

maitatago ko ba ang pagiging aktibista?

maglako o magtinda ng gulay o kaya'y taho

upang makaipon lang, aba'y di iyon malayo

- gregoriovbituinjr.

11.23.2024

Sa ika-32 araw sa ospital

SA IKA-32 ARAW SA OSPITAL

di pa kami nakalabas dito sa pagamutan

walang pambayad, naghahagilap pa ng salapi

ngunit hemoglobin ni misis ay kaybaba naman

kaya tuloy ang gamutan, isa iyon sa sanhi

mahal magkasakit, ah, kaymahal ding maospital

mga naipong salapi'y ginastos nang tuluyan

ako na'y ligalig, parang hangal, natitigagal

kung anong gagawin ng isang tibak na Spartan

na nagdurusa sa ilalim ng kapitalismo

kaya tumpak lang baguhin ang bulok na sistema

ngayon nga'y sinaliksik at binabasa-basa ko

yaong akda kina Norman Bethune at Che Guevara

anemik, kaybaba ng dugo, paano paglabas

ang hemoglobin niya'y paano magiging normal

imbes dose ay siyete, paano itataas

upang paglabas sa ospital, siya'y makatagal

isa itong panahong punong-puno ng pasakit

at palaisipang dapat lapatan ng solusyon

ako'y sadyang naliligalig na't namimilipit

parating na ba ako sa kalagayang depresyon

- gregoriovbituinjr.

11.23.2024

* mapapanood ang bisyo sa kawing na: https://www.facebook.com/reel/2255564971492605 

Warfarin

WARFARIN

tila mula sa warfare ang warfarin

at kasintunog naman ng 'war pa rin'

ngunit ito'y sistema ng pagkain

sa ospital anong wastong kainin

lalo kay misis, sakit ay kaiba

na may namuong dugo sa bituka

na doktor ay nabahala talaga

kaya kaagad siyang inopera

walang kain ng isang linggong higit

hanggang unti-unti kumaing pilit

di tulad ng kinakaing malimit

binigay sa kanya'y warfarin diet

pwede lugaw, walang kanin at manok

no dark colored, malambot ang malunok

may paliwanag bawat tray na alok

dapat maunawa, ito'y maarok

warfarin, sa bituka yaong digma

upang pagalingin ito ng sadya

sa pagkain sistema'y tinatama

unti-unti, sakit ay mapahupa

- gregoriovbituinjr.

11.22.2024

Krosword na Ingles, nasagutan din

KROSWORD NA INGLES, NASAGUTAN DIN

inaamin ko, nagsaliksik ako

sa internet, pagkat sinagutan ko

ang palaisipan ng The New York Times

na nalathala sa The Manila Times

krosword sa Ingles ay nabuo ko rin

interes dito'y nabigyan kong pansin

sa tulong ng internet sayt na DanWord

ay nasagutan ang Ingles na krosword

habang nagbabantay pa sa ospital

at kalamnan ko't diwa'y napapagal

sudoku't krosword na'y naging libangan

at Ingles na krosword ay natsambahan

di ko akalaing ito'y magawa

pagkat sa Pinoy krosword lang nahasa

naglilibang sa ganitong panahon

bantay kay misis magdamag, maghapon

- gregoriovbituinjr.

11.21.2024

* palaisipan mula sa The Manila Times, Nobyembre 21, 2024, p.C3

Book Sale

BOOK SALE

laking National at laking Book Sale

kayraming librong dito'y nabili

sa aklat ay di ako mapigil

lalo't diyan ako nawiwili

ngunit may ulat na magsasara

ang Book Sale na aking kinalakhan

sa MegaMall, pwesto'y nalipat na

sa Letre'y tinanggal nang tuluyan

sa Farmers at Fiesta Carnival

ang Book Sale pa nila'y nakatayo

sana patuloy sila't magtagal 

sila'y umiral pa't di maglaho

sa pagbabasa ako nag-ugat

kaya salamat sa mga libro

lalo sa Book Sale, mura ang aklat

binili't binabasa-basa ko

- gregoriovbituinjr.

11.20.2024

* dalawang unang litrato mula sa mga balita sa fb

* ikatlong litrato ay kuha ng makatang gala sa isang Book Sale branch

Paalam, Aegis Mercy Sunot

PAALAM, AEGIS MERCY SUNOT

taginting ng boses mo'y nanunuot

sa puso't diwa'y di nakababagot

tinig mong kapanatagan ang dulot

subalit wala ka na, Mercy Sunot

kami'y taospusong nakikiramay 

sa pamilya mo, O, idolong tunay

sa Aegis, taospusong pagpupugay

sa mga narating ninyo't tagumpay

mula nang mapakinggan ko ang Aegis

hinanap ko na ang awit n'yo 't boses

ginhawa sa puso'y nadamang labis

bagamat nawala na ang vocalist 

subalit mananatili ang tinig

sa aming henerasyon nagpakilig

Mercy, patuloy kaming makikinig

sa inyong awit at kaygandang himig

- gregoriovbituinjr.

11.20.2024

* litrato mula sa isang fb reel

Meryenda

MERYENDA

hopya ang nabili ko sa 7/11

sa tapat ng ospital upang meryendahin

may handa namang pagkain sa silid namin

pag di kinain ni misis, akong kakain

anumang sandali, pag ako'y nagutom na

maghahanap na ako kung anong meryenda

iiwang walang bantay si misis tuwina

lalabas ng ospital, tawid ng kalsada

pangdalawampu't siyam na araw na rito

mamaya, gagawin sa kanya'y panibago

endoscopy at colonoscopy raw ito

na sana sa colon cancer ay negatibo

animo, hopya yaong sa amin ay saksi

sa kwartong iyon, hopya ang aking kakampi

habang di palagay, sa ligalig sakbibi

di panatag ang loob sa araw at gabi

- gregoriovbituinjr.

11.20.2024

Pagngiti

PAGNGITI

palaging ngumiti, ang payo sa cryptogram

na isang palaisipan sa pahayagan

dahil búhay daw ay isang magandang bagay

at kayraming dapat ngitian nating tunay

cryptogram ay sinasagutan sa ospital

habang nagbabantay sa asawa kong mahal

higit tatlong linggo na kaming naririto

bukod sa pagtula, libangan ko'y diyaryo

ang pinayo ni Marilyn Monroe sa atin

tayo'y laging ngumiti, oo, Keep Smiling

subalit sa sakit ni misis ba'y ngingiti

ngingiti sa labas, loob ay humihikbi

makahulugan ang payo ng seksing aktres

ngumingiti ako pag kaharap si misis

upang ngiti rin niya'y aking masilayan

kahit siya'y nasa banig ng karamdaman

- gregoriovbituinjr.

11.19.2024

* "Keep smiling, because life is a beautiful thing and there's so much to smile about." ~ Marilyn Monroe

* larawan mula sa pahayagang Philippine Star, Nobyembre 19. 2024, pahina 9

Barya lang po sa umaga

BARYA LANG PO SA UMAGA

nakasulat: / barya lang po / sa umaga

habang aking / tinatanaw / ang pag-asa

na darating / din ang asam / na hustisya

lalo't iyon / ang pangarap / nitong masa

habang sakay / ng traysikel / ay nagtungo

roon upang / tupdin yaong / pinangako

naglilingkod / pa ring buo / ang pagsuyo

inaasam / na di basta / lang maglaho

mapanatag / ang kanilang / puso't diwa

sa maraming / isyu't asam / ay ginhawa

kasama ng / maralita't / manggagawa

kapitbisig / sa layunin / at adhika

may "feet off please" / pang kanilang / bilin dito

kaya ito'y / sinunod ko / ngang totoo

buti't bulsa'y / may barya pang / naririto

pinambayad / sa drayber ng / sinakyan ko

- gregoriovbituinjr.

11.19.2024

* mapapanood ang bidyo sa kawing na: https://fb.watch/vXzAaYN0fk/ 

Sa mga nag-ambag ng tulong

SA MGA NAG-AMBAG NG TULONG

sa panahong ito ng kagipitan

ay naririyan kayong nag-ambagan

nagbigay ng inyong makakayanan

nang lumiit ang aming babayaran

magmula petsa Oktubre Bente Tres

nasa ospital na kami ni misis

na sa kanyang sakit ay nagtitiis

dal'wampu't pitong araw na, kaybilis

bagamat nangyari'y nakaluluha

sakit ay tinitiis niyang sadya

ay gagawin ko ang kayang magawa

upang sakit niya'y di na lumala

tulad ng paghinging tulong sa inyo

pati paglalakad ng dokumento

sa mga pulitiko, PCSO

sa ibang malalapitang totoo

sa lahat ng nag-ambag ng tulong po

pasasalamat nami'y buong-buo

nang si misis sa sakit ay mahango

pasasalamat nami'y taospuso

- gregoriovbituinjr.

11.18.2024

Dagdag dugo muli

DAGDAG DUGO MULI

mababa na naman ang kanyang hemoglobin 

di pa abot ng otso, nasa syete pa rin

dapat ay dose, ang normal na hemoglobin 

kaya isang bag pa ng dugo'y isinalin

pandalawampu't limang araw namin doon

sa ospital, at nagninilay pa rin ngayon 

bakit ba laging mababa ang antas niyon

kaya ngayon, muling ginawa'y blood transfusion 

umaasa pa ring gagaling din si misis

mula sa sakit niyang kaytagal tiniis

problemang kinakaya kahit labis-labis

animo'y tinik sa dibdib na di maalis

kalagayan ni misis nawa'y bumuti na

at hemoglobin niya'y mag-normal na sana

- gregoriovbituinjr.

11.17.2024

* mapapanood ang bidyo sa kawing na: https://fb.watch/vVGAOey08J/ 

Palaisipan at payo

PALAISIPAN AT PAYO

lahat ng problema'y may kasagutan
kumbaga sa tanong, sinasagutan
tulad din ng mga palaisipan
salita'y hanapin ang kahulugan

nagpapayo sa mga problemado
bata, matanda, karaniwang tao
bigyang tugon ang mga tanong nito
na pinag-iisipan ding totoo

sa payo't palaisipan, salamat
pagkat kayrami nang nadadalumat
samutsaring damdamin, dusa, sumbat
ligalig, lungkot, paghihirap, gulat

tara, krosword ay atin ding laruin
pagkat ito'y malaking tulong na rin
baka payo nila'y payo sa atin
talastasan itong dapat alamin

- gregoriovbituinjr.
11.17.2024

* litrato mula sa pahayagang Pilipino Star Ngayon, Nobyembre 17, 2024, p.10

Pagtula habang nasa ospital

PAGTULA HABANG NASA OSPITAL

inaaliw ko ang sarili sa pagtula

sa ospital, kay misis ay nagbabantay pa

dito sa silid ay maraming nakakatha

suwero, higaan, pagkain, medisina

pati na samutsaring terminong medikal

ay nababatid pag doktor ay pinakinggan

na mga salitang ngayon ay inaaral

at aking isinasalin sa panulaan

ano ang blood clot, blood transfusion, blood extraction

infection of blood, bakit malapot ang dugo

matindi rin ang lagi niyang menstruation 

na madalas sa pad ang dugo'y buo-buo

bituka'y barado, inoperahan siya

hemoglobin niya'y syete, imbes na dose

rare case, ang sabi ng mga doktor sa kanya

nakikinig na lang ako't walang masabi

- gregoriovbituinjr.

11.17.2024

Sputum at rectum

SPUTUM AT RECTUM

maraming terminong medikal

ang natutunan sa ospital

halimbawa nito'y sputum

at laging narinig na rectum

na plema pala ang sputum

habang rectum naman ay tumbong

sinusuri ang ihi't dumi

anong kulay ng plema't tae

naalala ko sa sputum

at rectum ang Rerum Novarum

na noon pa'y nababatid ko

sulat ng Papa sa obrero

kaya sa tagal sa ospital

kayraming salitang medikal

ang akin nang natututunan

lalo't ospital na'y tahanan

iyang thrombosis of the portal

splenic and mesenteric veins

acquired hospital pneumonia

bacteria, anemia, mayoma

blood extraction, mga termino

pang ngayo'y inuunawa ko

habang nakabantay kay misis

na sa sakit ay nagtitiis

- gregoriovbituinjr.

11.17.2024

Hustisya sa biktimang taga-UP

HUSTISYA SA BIKTIMANG TAGA-UP

kahindik-hindik ang nangyari

sa isang staff mula UP

na dahil sa bugbog at palo

buhay ng biktima'y naglaho

nobyo ang pangunahing suspek

biktima'y nagtamo: traumatic 

blunt injuries sa dibdib, leeg

balitang nakapanginginig

nasabing magkatipang iyon 

magkasama raw sa La Union

bago pa umakyat ng Benguet

subalit nangyari'y kaylupit 

ang sigaw natin ay hustisya

hustisya'y kamtin ng biktima

katarungan sa binibini

hustisya sana'y hindi bingi

- gregoriovbituinjr.

11.15.2024

* ulat mula sa pahayagang Abante Tonite, Nobyembre 15, 2024, pahina 1 at 2

Ang kadakilaan, ayon kay Mike Tyson

ANG KADAKILAAN, AYON KAY MIKE TYSON 

dalawang larawan ang naroong ipinakita

si Floyd Mayweather na bodyguard ang mga kasama

at si Manny Pacquiao na napalibutan ng masa 

habang nasa gitna yaong sinabi ni Mike Tyson

hinggil sa kadakilaan, kaygandang laman niyon

na pag pinagnilayan mo'y kaybuting nilalayon

sinong dakila, sino nga ba ang tunay na baliw

anang isang awiting Pinoy na nakakaaliw

at mababatid sa masa sino ang ginigiliw

si Mike Tyson ang isa sa mga iniidolo

sa heavyweight ng isports na boxing sa buong mundo 

sinabi niyang iyon ay pinagtiwalaan ko

na ang pagiging dakila'y pagkilala ng bayan

at di pagsanggalang ng sarili sa mamamayan

salamat, Mike, sa kahulugan ng kadakilaan 

- gregoriovbituinjr.

11.16.2024

* litrato mula sa fb page ng Boxing TV

* Mike Tyson: "Greatness is not guarding yourself from the people; greatest is being accepted by the people."

Laro sa app game ng selpon

LARO SA APP NG SELPON

habang nagbabantay sa ospital 

sa selpon ay naglalaro ng app

nang di mainip o matigagal

madaling araw o gabing ganap

pinaglalaro muna ang isip

di makatulog, nais humimbing

kung anu-ano ang nalilirip

na nais tulain habang gising

nagninilay habang naglalaro

habang minsan ay nakatulala

sa laro't utang ba'y mahahango

isipin anong dapat magawa 

at pag may nanilay sa maghapon

ay tiyak may tulang laan doon 

- gregoriovbituinjr.

11.16.2024

* litrato mula sa app game na Twisted Rope, Level 29

Banderang Tad-Balik

BANDERANG TAD-BALIK

sa isang rali ko iyon nakunan

baliktad ang watawat ng samahan

pinuna agad ang mga may tangan

kaya agad nilang inayos naman

baka sa rali nababaguhan pa

sa init ng araw pinayong nila

unang beses tumangan ng bandera

subalit handa sa pakikibaka 

sila'y pinakiusapan lang natin

di sinigawan maging sila'y lumpen

ang mahalaga sila'y nakinig din

silang kaisa sa ating mithiin

baliktad man yaong sa KPML

ang layunin nila'y di mapipigil

na sa puso't diwa nakaukilkil 

na ang bulok na sistema'y masupil

- gregoriovbituinjr.

11.16.2024

* litratong kuha ng makatang gala sa isang rali sa Commonwealth Avenue, Lungsod Quezon, kasabay ng panawagang Climate Emergency, Nobyembre 15, 2024 ng umaga

* KPML - Kongreso ng Pagkakaisa ng Maralitang Lungsod

Ligalig

LIGALIG 

Kahapon, Nobyembre 13, alas-kwatro pa lang ng madaling araw ay nagtungo na ako sa Lung Center sa Quezon Avenue upang pumila sa PCSO. Hihingi sana ako ng tulong sa PCSO dahil malaki na ang hospital bill sa ospital. Nakaratay si misis doon.

Subalit sabi ng gwardya, wala na ang PCSO roon since pandemic. Nabigla ako.

Saan lumipat, tanong ko. Sa Shaw Blvd sa Mandaluyong. Kaya agad akong lumabas sa Lung Center, sumakay ng dyip hanggang Edsa.

Agad sumakay ng MRT patungong Shaw Blvd. Pagdating sa Manuela na ngayon ay Star Mall, sa terminal ng dyip, tinanong ko sa driver saan ang PCSO. Mga 250 meters lang, pwede mong lakarin.

Ah, kaya hindi na ako sumakay ng dyip. Nilakad ko na lang. Hanggang matanaw ko ang gusaling may malaking nakasulat na PCSO. Pasadong alas-singko na ako nakarating.

Pinadaan ako sa likod ng PCSO, habang may gwardya rin sa harap. Nabigyan ako ng guard ng stub number 4. Ibig sabihin, pang-apat ako sa pila. Sinabi rin ng guard na walang walk-in. Nakupo. walk-in ako. Aba'y dalawang linggo na kaming nag-aabang sa onlayn. Kaya sabi ni misis, pumila na lang.

Alas-otso pa pala ang bukas, kaya higit dalawang oras din akong naghintay. Bago mag-9 ng umaga ay tinawag na ako. Nag-usap kami ng taga-PCSO. Wala munang walk-in, sabi niya. Nilabas ko ang mga dokumento. Tiningnan niya iyon at nagbigay lang ng payo subalit sinabi niyang pulos onlayn na ang transaksyon sa PCSO.

Ikasiyam ng umaga, lumabas na ako ng PCSO. Nilakad ang patungong MRT. Sumakay patungong Cubao station.

Aba'y nakalampas ako ng baba. Hindi ko napansing Cubao na pala. Tumayo ako nang umandar na muli ang tren patungong sunod na istasyon. Nakita ko ang QMart. Kaya nakalampas nga ako. Bumaba na ako sa GMA-Kamuning station.

Sumakay muli pabalik ng Cubao. Pagdating ng Cubao ay sumakay ng dyip pabalik sa ospital.

Marahil kaya ako nakalampas ay ligalig na ako, kaunti rin ang tulog. Paano ba mababayaran ang higit Isang milyong pisong halaga ng hospital bill, gayong pultaym akong tibak. Si misis ang may sweldo bilang social worker.

Dahil ako ang asawa, sa pangalan ko naka-address ang sulat mula sa billing station. Ako ang sinisingil. Sinisingil ay isang pultaym na tibak. Paano ka hindi maliligalig? Buti, hindi ako natatabig ng sasakyan o nabubundol habang tumatawid.

naliligalig, litong-lito na

natutulala, grabe talaga

sa ospital, milyon ang halaga

ng paggamot kay misis, di ko na

alam saan kukuha ng pera

aktibistang pultaym ang tulad ko

kumikilos gayong walang sweldo

nasa ospital pa ang misis ko

mga babayaran ba'y paano

subalit lahat ay gagawin ko

sa PCSO aking nilakad

ang mga dokumentong kinalap

mga ahensya'y puntahang sukat

ligalig at pagod man sa lakad

ay gagawin ko pa rin ang lahat

- gregoriovbituinjr.

11.14.2024

Pabahay at karapatan, pinaglaban ni Ka Edwin

PABAHAY AT KARAPATAN, PINAGLABAN NI KA EDWIN

mahahalagang isyu ang ipinaglaban

ni Ka Edwin: ang pabahay at karapatan

nais niya'y maayos na paninirahan

at maitayo ang makataong lipunan

di dapat maagrabyado kahit dukha man

mga nanay ng na-EJK, tinulungan

naaapi'y tinuruan ng karapatan

ipinaglaban ang hustisyang panlipunan

mabuting kakosa, mabuting kaibigan

sa mga nakasalamuha n'yang lubusan

sa PhilRight, ZOTO, KPML, PLM man

TFD, Ex-D na kanyang pinamunuan

taaskamaong pagpupugay, comrade Edwin

daghang salamat sa pinagsamahan natin

sa marami, bayani kang maituturing

mga pinaglaban mo'y itutuloy namin

- gregoriovbituinjr.

11.12.2024

* ito ang ikalawang tulang binasa ng makatang gala noong lamay ng Nobyembre 12, 2024

* kuha ng isang kasama ang litrato sa isang pulong ng Ex-D sa Sampaloc, Maynila

* EJK - extrajudicial killings

* ZOTO - Zone One Tondo Organization

* KPML - Kongreso ng Pagkakaisa ng Maralitang Lungsod

* PLM - Partido Lakas ng Masa

* TFD - Task Force Detainees (of the Philippines)

* Ex-D - Ex-Political Detainees Initiative

Infusion complete

INFUSION COMPLETE

pag tumunog na ang aparato

"infusion complete", ang sabi rito

ang nars ay agad tatawagin ko

dextrose na'y tatanggaling totoo

kayraming suwerong nakakabit

kay misis, tila paulit-ulit

mga pasa sa braso'y malimit

turok dito't doon, anong sakit

patuloy lang akong nagbabantay

sa ospital, dito naninilay

ang maraming tula't bagay-bagay

sana'y gumaling na siyang tunay

pandalawampu't isang araw na

namin sa ospital, umaasa

akong siya'y gagaling talaga

sa sakit na dinaranas niya

- gregoriovbituinjr.

11.12.2024

* mapapanood ang bidyo sa kawing na: https://fb.watch/vOmcTYVzly/ 

Pagpupugay kay kasamang Edwin

PAGPUPUGAY KAY KASAMANG EDWIN

taaskamaong pagpupugay, comrade Edwin

na higit dalawang dekada ang nagdaan

noong dumalaw kayo ni Omar sa akin

habang hinihimas ko'y rehas sa piitan

tandang-tanda ko pa ang pangyayaring iyon

sa piitan tayo unang nagkakilala

hanggang dumating din ang asam na panahon 

ng paglaya't muling naging lingkod ng masa 

sa Ex-D Initiative, ako'y niyaya mo

sa grupo ng dating political prisoners

at doon kumilos, aktibong naging myembro

sigaw natin: Free All Political Prisoners!

pagpupugay, Ka Edwin, sa iyong pagpanaw 

isa kang inspirasyon sa mga kauri

ang mga nagawa mo'y magsisilbing tanglaw 

paalam, Kasamang Edwin, hanggang sa muli

- gregoriovbituinjr.

11.12.2024

Congrats, Aielle Aguilar, Edad 7

CONGRATS, AIELLE AGUILAR, EDAD 7

pagpupugay kay Aleia Aielle Aguilar

na nagwagi sa World Jiu-jitsu Festival

sa Abu Dhabi, siya'y edad pito pa lang

naging kampyon, pinakita ang kahusayan

siya ang pinakabatang three-time world champion

talagang ginapi ang nakalaban doon

sa Kids 2-Gray Belt ay wala nang nakalaban

kaya umakyat sa mas mabigat na timbang

anang ulat, mula labingsiyam na kilo

ay umakyat ng tatlong kilo at tinalo

ang mga kalaban at ganap na inangkin

ang ikatlong titulong pandaigdigan din

kaya sa batang kampyon, halina't magpugay

na sa kanyang larangan ay napakahusay

- gregoriovbituinjr.

11.11.2024

* ulat at litrato mula sa pahayagang Abante, Nobyembre 11, 2024, pahina 11