BAGONG HIGAAN NI ALAGA
ibinili ni misis ng higaan
si Alaga upang maging maalwan
ang kanyang pagtulog at pahingahan
at di sa sahig, o kung saan-saan
may kaskasan na rin ng kuko niya
pagkat may kalmot na ang mga sopa
may kama na siya, may kaskasan pa
kaya ibinigay iyon sa kanya
isinilang siya sa aming bahay
dalawang Abril na'y nagdaang tunay
magaling manilâ, tulad ng nanay
maabilidad, talagang mahusay
isang ngiyaw lang, karipas ang daga
pati mga bubuwit, nangawala
isang hunter pa naman si Alaga
talagang hanap lagi'y mga daga
salamat, Alaga, at naririto
sa bahay, naglalambing kang totoo
kaya bigyan ka lang ng kama'y wasto
at may pagkain pang laan sa iyo
- gregoriovbituinjr.
02.27.2025
* mapapanood ang bidyo sa kawing na: https://fb.watch/x-yY1j25PT/
Walang komento:
Mag-post ng isang Komento